2024 жылғы 16 қарашада Ұлттық ғылыми онкология орталығының хирургиялық күндізгі стационары бар консультативтік-диагностикалық орталығында қуық асты безі обырын ерте диагностикалауға арналған Ашық есік күні өтеді. 

ҚР ДСМ статистикалық деректері бойынша Қазақстанда жыл сайын қуық асты безінің қатерлі ісігінің 1700-ден астам жағдайы анықталады. Сонымен қатар, жыл сайын 350-ден астам адам қуық асты безінің қатерлі ісігінен қайтыс болады.

Қуық асты безінің қатерлі ісігі – ер адамдарда ең көп таралған онкологиялық аурулардың бірі. Бұл простата безінің эпителий жасушаларынан дамитын қатерлі ісік.

Зертханалық диагностиканың ең ақпараттық әдісі ісік маркеріне қан анализі – простата-спецификалық антиген (ПСА) деңгейін зерттеу болып табылады. Ақуыз көлемінің жоғарылауы қабыну процесін немесе онкологияның дамуын көрсетеді. Айта кету керек, ПСА қуықасты безі аденомасында, простатитте және мүшемен әртүрлі манипуляциялардан кейін (уретральды катетеризация, биопсия, массаж және т.б.) жоғарылауы мүмкін, сондықтан ПСА көтерілуінің әр жағдайын жеке қарау керек. Бұл талдауды 45 жастан кейін барлық ер адамдар тапсыруы керек. Қуық асты безінің қатерлі ісігі неғұрлым ерте анықталса, толық қалпына келтіру болжамы соғұрлым қолайлы болады.

Бастапқы кезеңдерде қуық асты безі обыры клиникалық түрде көрінбейді. Симптомдардың дамуы простата мөлшерінің ұлғаюымен және аймақтық және алыс метастаздардың пайда болуымен байланысты. Қуық асты безінің қатерлі ісігінің жиі кездесетін белгілері:

• зәр шығару проблемалары;
• зәрді толық ұстап қалуға дейін зәр шығарудың бұзылуы;
• зәр шығарудың басында немесе соңында зәр ағуының қиындауы;
• жиі зәр шығару, әсіресе түнде;
• сылбыр зәр ағыны;
• зәр шығару кезінде ауырсыну немесе жану сезімі;
• эрекцияның бұзылуы;
• зәрдегі немесе тұқымдық сұйықтықтағы қан;
• сүйектердегі ауырсыну (бел-сегізкөз омыртқаның бөлімі, жамбас, жіліншік және т.б.).

Көп жағдайда бұл белгілер қатерлі ісік ауруының белгісі емес. Қуық асты безінің қатерсіз гиперплазиясында, инфекцияда немесе басқа ауруларда бірдей белгілер болуы мүмкін.

Егер сізде урологиялық сипаттағы шағымдар, алаңдаушылық немесе денсаулығыңызды тексеруге деген қарапайым ниет болса, Ашық есік күніне Ұлттық ғылыми онкологиялық орталығына шақырамыз. Сіз тексеруден өтіп, уролог-дәрігерлерден тегін кеңес ала аласыз.

ҰҒОО-да тексеруден өтуге ниет білдіргендер алдымен уролог-дәрігерлерге Сall-орталықтың 8-7172-702-911, 8-7172-702-900 телефоны бойынша немесе WhatsАpp нөмірі бойынша тіркелуі қажет +7 708 425 07 11 (тек хабарламалар үшін) және қабылдау уақытына кешікпей келіңіз.

Өзіңізбен бірге жеке куәлігіңіз және толық кеңес алу үшін алдыңғы тексерулердің нәтижелері болуы керек (ПСА-ға қан анализі-простатаға тән антиген, қуық асты безінің трансректальды ультрадыбыстық зерттеуі).

Жазу жұмыс күндері жүргізіледі (дүйсенбі-жұма) сағат 8:00-ден 17:00-ге дейін.

Өзіңізге және денсаулығыңызға уақыт бөліңіз. Аурудың алдын алу-ең жақсы емдеу!

Қабылдау күні мен уақыты: 2024 жылғы 16 қараша, сағат 9.00-ден 13.00-ге дейін.

Мекенжайы: Керей, Жәнібек хандар көшесі, 3 - ҰҒОО хирургиялық күндізгі стационары бар консультативтік-диагностикалық орталығы (негізгі кіреберістің оң жағынан кіру) - Тіркеу орны.