Анальды өзек қатерлі ісігі – колоректальды қатерлі ісіктен ерекшеленетін және диагностикасы мен емдеуіне өзіндік тәсілді қажет ететін жеке онкологиялық ауру. Алайда қазіргі таңда Қазақстанда бұл ауруға арналған жеке клиникалық хаттама жоқ. Мұндай пацменттерді жүргізу алгоритмдері тік ішек қатерлі ісігі бойынша клиникалық хаттамаға енгізілген.

Ұлттық ғылыми онкология орталығының мамандары анальды өзек қатерлі ісігін диагностикалау және емдеу бойынша жеке клиникалық хаттаманың жобасын әзірледі. Құжатты енгізу пациенттерді жүргізудің бірыңғай тәсілдерін қалыптастыруға, медициналық көмектің сапасын арттыруға және Қазақстанда осы ауру бойынша жеке статистикалық есеп жүргізуге мүмкіндік береді.

26 қыркүйекте клиникалық хаттама жобасы алғаш рет кәсіби медициналық қауымдастыққа ONCO FUTURE KAZAKHSTAN 2026 аясындағы арнайы секцияда таныстырылады. Құжаттың негізгі ережелері туралы Ұлттық ғылыми онкология орталығының онкоколопроктолог дәрігері Сауле Хамзина баяндама жасайды.

Іс-шара барысында анальды өзек қатерлі ісігін емдеудің заманауи тәсілдері де талқыланады. Талқылауға шетелдік сарапшылар қатысады. АҚШ-тың Орегон штатындағы Oregon Health & Science University профессоры, радиациялық онколог Тимур Митин заманауи сәулелік терапияның мүмкіндіктері және емдеу тиімділігін сақтай отырып, оның уыттылығын төмендетуге мүмкіндік беретін тәсілдер туралы баяндайды.

Ресейдің Мәскеу қаласындағы Н.Н. Блохин атындағы Ұлттық онкология медициналық зерттеу орталығының жетекші ғылыми қызметкері, медицина ғылымдарының докторы, онколог дәрігер Сергей Гордеев анальды өзек қатерлі ісігінің қайталануы кезіндегі емге тоқталады. Бұл – клиникалық тәжірибедегі ең күрделі жағдайлардың бірі.

Қазақстандық және шетелдік мамандардың қатысуымен өтетін талқылау Қазақстанда анальды өзек қатерлі ісігін диагностикалау, емдеу және есепке алудың дербес жүйесін қалыптастыру бағытындағы маңызды кезеңдердің бірі болмақ.